كيفية تحفيز المرؤوسين
بقلم ميزو الزملكاوي
الصفحة الرئيسية >> العدد الثالث >> كيفية تحفيز المرؤوسين
اولا ..... يعنى ايه تحفيز ؟؟؟؟ !!!!
التحفيز .... انك تخلى العاملين عندك او المرؤوسين يبذلوا اقصى جهد ممكن عشان تحصل على افضل النتائج بوسيله من الوسائل اللى هنذكرها دلوقتى ......
انواع الحوافز ......
حوافز سلبيه : وهى انك كمدير تستخدم القوه و الجبر عشان تبث الخوف فى نفوس العاملين وبالتالى تخليهم يبذلوا اقصى جهد ممكن ......
وسائل القوه والجبر اللى بتستخدم فى الطريقه دى زى : تنقل الموظف لمكان غير مرغوب فيه – تخصم من مرتبه – تخفض من درجته الوظيفيه – تضعه فى قسم غير مرغوب فيه
بس على فكره الطريقه دى نادرا ما تأتى بنتائج ..... ولو جابت نتائج هيكون ليها اثر سلبى عليك انت كمدير لانها هتخلى كل العاملين يكرهوك ودى اسوأ حاجه ممكن تحصلك فى حياتك المهنيه ان حد من العاملين عندك او معاك يكرهك .....
والطريقه دى موجوده بس بيستخدمها المديرين الغير مؤهلين اداريا او الغير مختصين اداريا يعنى مثلا واحد يكون والده مدير شركه ثم يورثهاله وبالتالى تنتقل الاداره من الاب للابن على الرغم من ان الابن لا يفقه شىء عن الاداره ........
ثانيا الحوافز الايجابيه : وبتتمثل فى :
1- النقود( عامل الحفز المادى) : زى ما كلنا طبعا عارفين الفلوس متطلب هام من متطلبات الحياه لانها بتساعد الانسان على الوفاء باحتياجاته اليوميه ومتطلبات الحياه زى المأكل والملبس والمسكن وغيرهم الكثير ....... والنقود بتعتبر من اهم عوامل التحفيز الايجابيه ..... فلنفترض دلوقتى انك مرؤوس والمدير وعدك بمكافأه ماليه كبيره او بزياده فى الراتب لو انت قمت بعمل ما ......
الطبيعى انك هتبذل اقصى جهد ممكن عندك عشان تقوم بالعمل ده ومن ثم تحصل على المكافأه اويزيد راتبك وتقدر تسد متطلباتك اليوميه والحياتيه....... و ما ذكرناه الان هو ما يسمى بالحفز المادى او نظام الحوافز الماديه ......
معلومه عالماشى ...... مش كل الافراد يناسبهم النوع ده من الحوافز او بمعنى اصح ....... انت دلوقتى لو مدير وعايز تحفز عامليك او مرؤوسيك ما تستخدمش معاهم كلهم اسلوب الحفز المادى لان مش كل الافراد يناسبهم النوع ده من الحوافز لان هناك بعض الافراد بيكون الحافز ليهم هو ان يكون له سمعه طيبه فى الشركه وان يشعر باحترام النفس وتقديره من الاخرين يعنى من الاخر ..... لو انت مدير وعايز تطبق نظام الحوافز الايجابيه لازم تدرس شخصية العاملين عندك كويس اوى عشان تعرف انت هتطبق عليهم اى نظام من نظم الحوافز ......
2- المشاركه والمنافسه : فالمشاركه والمنافسه بين العاملين فى العمل من اهم عوامل الحفز الايجابيه اللى بتخلى المرؤوس يبذل اقصى جهد ممكن عنده ويطلع كل الطاقه الكامنه اللى مستخبيه جواه عشان يثبت انه من افضل الموظفين اللى موجودين فى الشركه وبالتالى يكون عند حسن ظن مديره ويحصل على رضاه ومن ثم الحصول على المكافات وزيادة الراتب والانتقال الى درجات وظيفيه اعلى .........
3- نوع الوظيفه :فالوظيفه اللى انت بتشتغلها بيكون ليها تاثير كبير جدا على بذلك اقصى جهد من عدمه ........ فلنفترض دلوقتى انك من صغرك كنت بتحلم تبقى دكتور وربنا كرمك ودخلت طب فمعنى كده انك لما تتخرج وتشتغل دكتور هتبذل اقصى جهد عندك لانك من الاول وانت حابب الوظيفه دى ...... على عكس واحد تانى كان نفسه يبقى دكتورولقى نفسه مثلا فى كليه تانيه هو مش حاببها وبالتالى هيشتغل شغلانه هو مش حاببها فالشخص ده لما ييجى يشتغل مش هيبذل اقصى جهد عنده لانه من الاول مش حابب الوظيفه دى ..........
وعشان نتلاشى النقطه دى ...... لازم نزرع جوا العاملين حبهم لعملهم عشان نحصل على افضل النتايج ............
روتينية العمل كذلك ليها تأثير كبير جدا على بذلك اقصى جهد من عدمه ........ فالاعمال الروتينيه بتخليك تحس بالملل والرتابه نتيجة تكرار الاعمال اللى بتقوم بيها وبالتالى بتأثر على ادائك فى العمل وبذلك لأقصى جهد
4- اثبات الذات واحترام النفس وتقدير الاخرين :
فلنفترض دلوقتى انك مدير ووعدت عامل عندك بزيادة الدرجه الوظيفيه ليه اذا قام باعماله بدقه وجوده عاليه واداء متقن ...... فده هيبقى حافز كبير جدا للعامل انه يبذل اقصى جهد ممكن عنده عشان يرتقى وظيفيا لانه هدفه فى الحياه انه يرتقى وظيفيا ويشغل اعلى المناصب وليس زيادة الراتب فقط ......