الأستاذ الدكتور حسين عيسى أستاذ المحاسبة و عميد الكلية , أكثر الأساتذة شعبية في الكلية , الأستاذ الأفضل دائماً في إستفتاءات الطلاب .

حددنا موعد معه لإجراء هذا الحوار , و أستقبلنا في مكتبه فماذا قال ؟

إليكم نص الحوار :

- أهلا و سهلا بحضرتك , بداية نحب نتعرف بحضرتك أكثر .. حضرتك من مواليد محافظة إيه ؟

القاهرة .

- و الأسرة ؟

أختين أنا أكبرهم .

- حضرتك في ثانوي كنت عايز تدخل كلية التجارة؟

لأ كنت عايز أدخل كلية الطب , ده الإنطباع الأولي بس بعد شهر في كلية التجارة حسيت إنها المكان اللي كان المفروض أدخله , أيقنت إن دي الكلية اللي كان المفروض أدخلها .

 

- أول يوم لحضرتك في الكلية ؟ تفتكر عنه إيه ؟

 إحنا دفعة شهيرة , دخلنا الكلية سنة 1973 بعد حرب أكتوبر و إتأخرت الدراسة شوية و دخلنا الكلية بعد الحرب ,  و أول يوم كان بالنسبة لي صدمة مروعة , أعداد كبيرة و كان مفيش مقر للكلية كنا بناخد المحاضرات في مدرجات حقوق و آداب , بس بالتعود طبعاً حصل نوع من التوافق و التوائم مع ظروف الدراسة وقتها .

- الأساتذة اللي آثرت عليك في الكلية ؟

دول كتير جداً جداً مش واحد بس ,  في سنة أولى مثلاً الله يرحمه أستاذ الإقتصاد دكتور يحيى عويس , و أستاذ دكتور محمد الجزار أستاذ التكاليف درس لي في تالتة و رابعة و كان مشرف على الماجستير , أستاذ دكتور حسن كمال أستاذ الأساتذة في الضرائب كان بيدرس لي , خصوصاً الأستاذ الدكتور حسن غلاب رئيس الجامعة الأسبق .

- الإختلاف بين وقت ما كنت حضرتك طالب و حالياً في طرق التدريس ؟

حصل تطور كبير طبعاً , في الأول كان فيه إعتماد أساسي على الأستاذ , حالياً فيه Data Show و فيه PowerPoint Presentation و وسائل مساعدة و في النهاية رغم كل الأساليب دي ما زال الأستاذ هو الأساس في رأيي الشخصي .

- و الفرق في المناهج ؟

فيه تغيير كبير , إحنا كنا بندرس 8 مواد في السنة , حالياً 12 مادة , و فيه تطوير و دخول في التفاصيل بعكس اللي كان بيحصل زمان .

- حضرتك إتخرجت بتقدير إيه ؟

جيد جداً مع مرتبة الشرف , أول الدفعة سنة 1977 .

- حضرتك كنت بتذاكر إزاي  ؟

انا مش بحب كلمة نظري و عملي , فيه مواد بتم التعبير فيها عن المادة العلمية بأسلوب أدبي كتابي  , في المواد دي كان لازم أقرأ المادة مرتين تلاتة و أكتبها بأسلوبي , بعكس ما بيحصل دلوقتي الطالب بيحفظ ملخصات و بيكتب في الأخر كلام مش مظبوط , كنت بادي وقت كبير للمذاكرة و أقرا الموضوع أكتر من مرة بحيث أقدر أكتبه , و أدي وقت طويل للمذاكرة بحيث أقدر أكتب الموضوع بدون ملخصات , أما المواد العملية بتكون أسهل و السيطرة على المادة أسهل بمجرد ما تسيطر على التمارين و الـ cases اللي في الموضوع , و بالتالي باقدر أسيطر على المادة .

- حضرتك بعد ما إتخرجت إتعينت معيد .. ؟

اه في نفس السنة .. أكتوبر 1977 .

- و ده أثر على حضرتك إزاي ؟

أنا مكنش ليا جيش , و دخلت تمهيدي ماجستير في نفس السنة , إنتقلت من طالب عنده كتاب بيدرسه و يذاكره و يمتحن فيه إلى طالب بيقرا الموضوع من كذا كتاب و كذا مرجع و علمني أساتذة عظام يعني إيه البحث العلمي , يعني إيه إن إنت تتناول الموضوع من كذا مصدر و تدي رؤيتك الخاصة للموضوع , طبعاً فرق كبير أوي .

- حضرتك بدأت تدرس بعد التخرج بكام سنة ؟

بسنة واحدة , في أكتوبر 1978 .

- شعور حضرتك كمدرس , تقف أمام الطلاب , مش جالس بينهم ..؟

كان شعور غريب شوية في الأول , تخيل الطالب عايز يعرف حاجة و الحاجة دي عندك إنت , كنت دايماً بقول للطلاب إنك تنجح من غير ما تفهم تبقى معملتش حاجة , و إنك تتفهم من غير ما تنجح تبقى برده معملتش حاجة , إنت هنا عشان تنجح و عشان تفهم , و كنت دايما بحاول و أنا معيد أحقق المعادلة الصعبة دي .

- حضرتك بتتمتع بـ Presentation skills عالية جداً , حضرتك درست لي في سنة تالتة , و أنا أحد طلاب Edu-Egypt المرحلة التانية و في حفل التخرج حضرتك كنت من أفضل المتحدثين و ده إنعكس على درجة التصفيق .

الله يخليك , في الحقيقة اليوم ده أنا باعتبره  يوم تاريخي مش عشان تم تكريمي لكن عشان تم تكريم تجارة عين شمس ككلية .

- حضرتك حصلت على درجة الدكتوراه منين ؟

من أمريكا , الماجستير من مصر و الدكتوراه من أمريكا .

- و تجربة السفر ؟

تجربة مثرة طبعاً , أنا تعمدت أخذ زوجتي و أولادي عشان يعيشوا التجربة معايا و كانت قصة كفاح كبيرة , الحمد لله .

- حضرتك قضيت بالخارج قد إيه ؟

4 سنين متواصلة بس رجعت درست تاني بعد كده .

- أهم الدروس المستفادة من رحلة السفر ؟

إنك تتوافق و تتكيف مع واقع مختلف عن الواقع اللي إنت عايش فيه , إزاي تحترم هذا الواقع و تستفيد بالموجود فيه , و تحاول تبقى عضو فاعل , قبل ما أسافر الناس حذروني : هيعملوا لك غسيل مخ , و هيقولوا لك أفكار مش مظبوطة . بس ده محصلش , هما هناك بيدوك بعد الأفكار وإنت حر تقبلها أو ترفضها بدون ضغط , في الحقيقة شفت في أمريكا نظام مفتوح بيدي الفرصة لمن يثبت وجوده , أنا كنت طالب و لما خلصت رجعت نفس الجامعة كأستاذ و حققت نجاح كبير جداً فيها , النظام هناك مفتوح , ممكن تحقق تفووق بغض النظر عن جنسيتك و ديانتك و نوعك .

- حضرتك لما رجعت مصر بعد الدكتوراه .. إيه إختلف ؟

الإختلاف إني رجعت مدرس , و ده بيلقي عليك بأعباء تدريسية كبيرة جداً , و في نفس الوقت أنا إنتهجت سياسة مختلفة , الكلية جزء من إهتمامي , بأدي واجبي كأكاديمي على أكمل ما يكون , بس لازم أطلع برا , إشتغلت في الإستشارات سنين طويلة و في مجال التدريب , يعني كان الشغل الخارجي جزء مهم جداً لا يقل أهمية عن الشغل في الكلية , و أنا مؤمن جداً إن أستاذ الجامعة لازم ينفتح على العالم , خصوصاً في مواد تطبيقية زي مواد كلية التجارة الخبرة لا تقاس بالقراءة و الكتابة و لكن تقاس بالإحتكاك بالعالم حولك .

- هل المراجع التجارية العربية كافية ؟

لأ مش كافية طبعاً , لابد من العودة للكتب الأجنبية , لا أحد ينكر إننا عندنا تراث كبير جداً و محترم جداً من المراجع العربية , بس الكتب الأجنبية تعطي تحديث أسرع للمعلومات .

- طيب ليه التحديث ده مش بيتم في المراجع العربية مباشرة ؟

بيتم بس بصورة أبطأ , برا الكتاب عبارة عن مشروع , دار نشر بتتبناه , فيه معاونين كتير للأستاذ في تأليف الكتاب , لكن هنا كل الجهد ملقى على عاتق الأستاذ ,  بيكتب و بيترجم و بيطبع .. عملية شاقة جداً , لكن برا , بيكون دورك محدد و فيه فريق عمل كبير جداً خلف نجاح الكتاب .

-  الطالب بيتخرج و هو مش عارف حاجة عن الشهادات المهنية , إزاي نحل المشكلة دي ؟

إحنا بقالنا فترة بنعمل ندوات للتوعية عن هذه الشهادات , من خلال وحدة التنمية البشرية و مركز البحوث و  وزارة الإتصالات و عاملين إتفاقية مع غرفة التجارة الأمريكية لعمل ندوات لشرح انواع الشهادات بحيث الطالب يقدر يختار الشهادة المناسبة ليه .

- الحياة السياسية للطلاب في الكلية .. إلى أين ؟

أنا مش عاوز أقول الحياة السياسية , أنا بقول النشاط الطلابي بشكل عام , الطالب هنا بيدرس و بيمارس أنشطة ,   عندنا رعاية الشباب و إتحاد الطلبة و لجان متخصصة و نشاط رياضي و ثقافي و إجتماعي , و إحنا من أكتر الكليات اللي فيها نشاط طلابي , و بندخل مسابقات و بنحصد المراكز الأولى , و بندعم باستمرار النشاط الطلابي , لإن الطالب لا يمكن شخصيته هتتبني بمجرد الدراسة , لا بد من ممارسة النشاط الطلابي .

- أحد الطلاب بيسأل : ليه أنشطة الكلية بتبتقصر على دورات كرة القدم و الحفلات ؟

هذا غير صحيح , فيه لجان ثقافية و بتعمل شغل جامد جداً جداً , و فيه لجان رياضية و إجتماعية و رعاية الشباب بتعمل شغل جامد جداً .

- أنا أتذاكر أثناء دراستي حضرتك إضطريت تلغي محاضرة بسبب الصوت العالي للحفلات .

السنة دي مفيش ولا حفلة إتعملت , و هيتم التنسيق بين المواعيد و بنراعي ده حالياً بعد المشكلة اللي حصلت دي .

- أحد الطلاب بيسأل ليه الإمتحانات هتتم في 3 أسابيع بدل أسبوعين ؟ ده هيقلل الإختلاط و بالتالي هيقلل إنتشار المرض و هيدي فرصة للطلاب تذاكر .

ده قرار مجلس الجامعة , و بنطبقه لأول مرة بهدف تقليل عدد أسابيع الإمتحانات عشان لو ظهرت حالات لا قدر الله نقدر نوقف الدراسة و يبقى فيه فترة للإمتحانات , و أنا قلت للطلبة إن ده في صالحهم لإن الدراسة توقفت 31 ديسمبر و الإمتحانات 21 يناير .. فيه فترة كافية للمذاكرة يدوب اليوم و نص قبل الإمتحان يكونوا مراجعة , في النهاية هي هي يعني .

- ليه ميكونش فيه تنظيم في مسألة الحضور و الغياب في الكلية ؟

زيادة العدد , إحنا عندنا سبعين ألف طالب , تنظيم العدد ده صعب جداً , العدد الكبير هو العائق الأساسي

- ليه الكلية بتقبل طلاب فوق طاقتها ؟

نحن لا نقبل طلاب , إحنا بنقترح أعداد تتناسب مع قدراتنا لكن وزارة التعليم العالي بترسل لنا الأعداد دي , إحنا مش مسئولين عن هذه الأعداد .

- ليه مش موجود في مرحلة البكاليريوس أقسام غير المحاسبة و الإدارة ؟

إحنا حالياً بصدد تغيير اللائحة بحيث نقدر نوسع التخصصات و يبقى بدل قسم المحاسبة يتقسم لأقسام كتير زي محاسبة ضريبية و مراجعة و محاسبة إدارية و الإدارة إلى تسويق و إدارة موارد بشرية .. وهكذا ...

- نتوقع حدوث ده إمتى ؟ السنة الأكاديمية الجاية ؟

حوالي سنتين إحنا شغالين عليه دلوقتي .. حوالي سنتين كمان .

- يقول أحد الخريجين أن صديقه في قسم اللغة الإنجليزية أنه في وصل مصاريفه بند "إعانة تجارة عربي" و هو يعتبر هذه إهانة .

هذا كلام غير صحيح , مفيش وصل بالشكل ده , هذا خطأ جملة و تفصيلاً .

- أحد الطلاب بيحب دراسته جدا و مواد الكلية جداً , بس بيستاء من ضخامة حجم المناهج و قصر وقت الإمتحانات .

حالياً الأساتذة بتراعي النقطة دي وبنحاول نخلي وقت الامتحان يناسب وقت الأسئلة , بس لازم الطالب يدي وقت أطول للمذاكرة , للأسف الطلبة بتتذكر الإمتحانات في وقت يعتبر قصير لمراجعة المادة العلمية .

- أحد الطلاب بيشعر بظلم من تصحيح الإجابات و يرى إنه ده أثره سيء على الطلاب , نتيجة التصحيح السريع , و قد يظن أحد الطلاب إنه لن ينجح و يفاجئ بتقدير إمتياز أو العكس ...

انا مشفتش طالب بيجيب مقبول و فجأة جاب إمتياز أو العكس , بتلاقي المستوى طول الأربع سنين متقارب , بس اللي بيحصل إن طالب جاوب إجابة في مادة نظري و متوقع إنه ينجح فيها , و يكون الفرق على النجاح درجة أو درجة و نص , ده فرق بين تقييم الطالب و تقييم المصحح , و بعدين مفيش أستاذ بيصحح لوحده , قسم محاسبة فيه 90 أستاذ و قسم إدارة فيه 90 أستاذ .

- عدد الدفعة كام يا فندم ؟

بيختلف من سنة لسنة .

- متوسط ..؟

9000 طالب , و كل أستاذ مش بيصحح الـ 9000 ورقة بيصحح سؤال في الورق و أستاذ تاني بيصحح سؤال تاني و هكذا , غير ما كان زمان أوي الأستاذ بيصحح الورق لوحده .

- طيب لو طالب حاسس إنه إتظلم في التصحيح يعمل إيه ؟

يقدم إلتماس

- الإلتماس ده لإعادة الرصد ولا إعادة التصحيح ؟

إعادة رصد لتصحيح أي خطأ مادي , مفيش حاجة في قانون الجامعات إسمها إعادة تصحيح , ده غير قانوني .. إعادة الرصد معناها فحص الورقة فحص كامل للتأكد إن كل الورقة إتصححت .

- مادة الحاسب الألي في الكلية فقيرة للغاية للأسف ... ليه كده ؟

هي المادة دي المفروض تكون تطبيقية بحتة , و لكن نظراً لضخامة الأعداد تحولت لمادة نظري و إحنا بصدد تطويرها دلوقتي مع باقي المواد .

- أحد الطلاب بيسأل ليه مش بنشوف الحاسب الألى في شئون الطلاب عند دفع المصروفات و عند إستعلامات الطلاب ؟

الحاسب الألي دخل في أماكن معينة في الكلية زي الكنترول و كشوف الإمتحانات و لكن كشبكة كاملة و يكون لكل طالب ID يشتغل بيه طول السنة دي محتاج جهد كبير و إحنا شغالين فيها دلوقتي بالتعاون مع الجامعة .

- ليه موقع الكلية مش شغال ؟

دي مشكلة بنحاول نحلها حالياً و هتتحل خلال 3 شهور .

- أحد الطلاب بيسأل حضرتك عن تعليقك على الموقف التالي : كانت محاضرة تطبيقات الحاسب الالى فى المجالات التجارية وكان الدكتور محمد عبد ربه بيشرح مسائل فى العمليات الحسابية للنظم العددية فبعت للدكتور سؤال عن مجالات تطبيق النظام ده فكان الرد غريب جدا وهو انى احله فى الامتحان لما اتسأل فيه وانساه بعد كده !!! بالفعل هذا كان الرد وبجدية , طبعا بعدها انا لم اذاكر جزء الدكتور وكان عليه 5/20 ونجحت فى الامتحان .

نفس ردي السابق .. جاري تطوير المادة .. مقدرش أقول أكتر من كده .

- بنلاحظ إن الأساتذة عباقرة في مجالاتهم ولكن تنقصهم أساليب التوصيل presentation  and communication skills , ليه مش بيتم مراعاة ده ؟

دي مشكلة عالمية مش مشكلة تجارة عين شمس , أنا أبني بيدرس في كندا حالياً و بيعاني من نفس المشكلة , برا مصر أحد مجالات تقييم الأستاذ قدرته على توصيل المعلومة لكن هنا مش بيحصل للأسف .

- طيب ليه الجامعة مش بتعمل دورات لزيادة المهارات دي ؟

بنعمل بس النتائج بتختلف من شخص لأخر , يعني الدورة بيدخلها شخصين مختلفين بيتفاعلوا معاها بطرق مختلفة و بالتالي النتيجة مختلفة , و التحسن بيحصل بالتدريج .

- حضرتك ندمت إنك بقيت أستاذ جامعي ؟

أبداً

- أيهم أحب إلى قلبك كونك طالب أم معيد أم دكتور أم عميد ؟

دكتور طبعاً .. دي شغلتي , أنا أستاذ جامعة , لكن العميد ده منصب إداري فترة زمنية و بتخلص لكن شغلتي الأساسية إني أستاذ .

- هل ترى أجيال الكلية من الأحسن للأسوأ أم العكس ؟

أنا متفائل بالمستقبل , من الأسوأ للأحسن ..

- أصعب موقف واجهته في الكلية ؟

أول يوم دراسة و أنا طالب كان أصعب يوم .

- كده خلصنا الأسئلة , أنا مشتكر جداً على وقت حضرتك .

و أنا متشكر على الأسئلة الجميلة دي .

--------------------------------------------------------------------------------

إلى هنا إنتهى حوارنا مع الأستاذ الدكتور حسين عيسى عميد الكلية

نتمنى لكم قراءة ممتعة