الشرح المتين في تحديد الدائن و المدين
بقلم James Bond
الصفحة الرئيسية >> العدد الأول >> الشرح المتين في تحديد الدائن و المدين
السلام عليكم و رحمة الله و بركاته
كلنا عارفين إن فكرة القيود نشأت مع نظرية القيد المزدوج , اللي بتقول إن أي عملية
محاسبية ليها طرفين واحد مدين و التاني دائن .
مثلاً إشترينا سيارة لنقل بضائع الشركة و دفعنا ثمنها .
كده إيه اللي إتأثر ؟
سيارات الشركة زادت , و فلوس الشركة قلت ..
هما دول طرفي العملية .. طيب إزاي نحدد مين مدين و مين دائن بقى ؟؟
الأول نعرف إيه هي أنواع الحسابات ..
حسابات حقيقية Real
Accounts
يعني إيه حقيقي ؟
يعني موجود ... يعني نقدر نبيعه أو نشتريه أو نجرده أو نولع فيه .. زي المخزون /
السيارات / النقدية ..
حسابات شخصية Personal
Accounts
حسبات متعلقة بكيان معين .. سواء شخص (أحمد / سيد )أو شركة أو هيئة معينة (شركة كذا
/ مؤسسة كذا)
حسابات وهمية Virtual
Accounts
دي حسابات مش موجودة في الحقيقة .. منقدرش نمسكها ولا نبيعها .. زي المصروفات و
الإيرادات و المشتريات و المبيعات ..
مينفعش تتصرف في مصروف الأجور مثلاً بالبيع أو بالشراء أو بالتنازل ..
لاحظ إن المشتريات مش حساب حقيقي لإنها تعبر عن البضاعة (حساب حقيقي) و لكن بسعر
الشراء . و حساب المبيعات يعبر عنها بسعر البيع .
طيب لكل نوع من الحسابات دي طبيعة معينة سواء دائن أو مدين .
بالنسبة للحسابات الحقيقية : أصلها مدين .. و لو زادت تفضل مدين , و لو نقصت
تبقى دائن .
بالنسبة للحسابات الشخصية : تعامل معاملة الأصول و الخصوم ..
الأصل لو زاد مدين و لو نقص دائن .
و الخصوم لو زاد دائن و لو قل مدين .
يعني مثلاً إشتريت بضاعة من شركة الخير للتجارة .
لما إشتريت .. قيمة حساب شركة الخير عندك زاد ولا نقص ؟ زاد طبعاً بقيمة البضاعة .
طيب هو خصوم ولا أصول ؟
ده دائنين .. خصوم طبعاً ... يبقى لما يزيد يبقى دائن .. و هكذا ..
بالنسبة للحسابات الوهمية :
المصروفات و الخسائر و المشتريات : مدينة ...
الأرباح و الإيرادات و المبيعات : دائنة ...